اسمحوا لى اناقش معاكم موضوع بجد غريب جداً
كالمعتاد زى كل يوم فتحت الإيميل وشوفت الإيميلات الجديدة ولفت انتباهى ايميل أسمه ( أول موقع زواج مسيحى ) دخلت شوفت الوقع واسمحوا لى اجيب لك بعض الكلمات المكتوبة به :
( في بداية الحديث ارجوا التنويه على أن الموقع في غاية الأمان على بياناتكم ونحن في استعداد تام لتقديم أية خدمات لأي عضو وسنقوم بالإشراف على كل عضو مسجل وسنقوم بالإشراف أيضا على أي ارتباط وهذا حسب ما يريده العضو أو ألعضوه والموقع يقدم جميع خدماته لجميع الأقباط وغير الأقباط المسيحيين بكل أنواع الطوائف و نرجوا المشاركة بجدية بالموقع وعدم التلاعب لعدم المنع من التسجيل نهائياً والمنع من دخول الموقع ونحن نقبل دائما بأي خادم يريد الخدمة بجدية معنا ولإلهنا كل مجد وكرامة دائماً صلوا لأجلنا ولأجل الخدمة )
وطبعاً بعض الآيات من الكتاب المقدس مثل :
( كللهما أيها الأب... باركهما أيها الابن ... قدسهما أيها الروح القدس كما باركت عرس قانا الجليل بارك )
إلى هنا ينتهى الكلام عن الايميل او الموقع
++++++++++++++
اسمحوا لى اقول تعليق شخصى ، ومش بعممه طبعاً
بصراحة شديدة انا حزنت جداً للمستوى اللى وصلنا ليه بأمانة ، وصلنا لمرحلة اننا بنعمل موقع للزواج ، طب ازاى ؟؟ حد يشرح لى
يعنى لما ييجى واحد يسجل ويكتب بياناته والله اعلم هاتبقى صح ولا غلط ، وتييجى واحد تقول هو ده العريس اللى يناسبنى لمجرد أن بياناته اللى هى عايزاها !!
طب أزاى ، لما الايميل نفسه اسمه اول موقع للزواج المسيحى الرباط المقدس
يعنى بأعتراف الموقع ان الزواج ده رباط مقدس بين اتنين ، بيكون قبليه فى صلاة لرب المجد واستشارة لأب الأعتراف وغيره وغيره
فجأة يتحول الزواج لمجرد موقع ؟؟
بجد مش هاقولكم الموضوع ضايقنى اد ايه على الصبح
واتمنى ان صاحب الموقع يشوف الموضوع ده ، وبقوله لو سمحت الموقع تشيل منه الآيات المقدسة وما تدخلش المسيحية فيه بأى شكل ، لأنى ما اعتقدش ان فى مسيحى واحد ممكن يوافق انه يشترك فى هذه المهزلة تحت مسمى الزواج المقدس
وفى نهاية كلامى ده رأى شخصى ليا انا ++sameh++ وليس رأى عام
وبأكد عليه مرة تانية
__________________
وعد الله الأمين للبشرية :
+ + ها أنا معكم كل الأيام وإلى إنقضاء الدهر +